إنشودة لابن النيل

إنشودة لابن النيل
شعر / حامد عبد الحليم الأطير
قلبى معاك ياطيب
وأنت قايم
الصبح بدرى
ونور الفجر
فى السما بيبدى
والبشر فى
وجهك بيضوى
وترفع كفوفك
للسما وتدعى
تقوم تحلب
جاموستك بحنية
وأم العيال منورة
شمس صبحية
وتسمى ربك
وتاكل لقمة هنية
****
وتشيل فاسك
على أكتافك
وتوصى أبنك
أوعاك تنسى
كتابك وألا كراسك
وانهل العلم يا ابنى
واملا به راسك
علشان بكره تخدم
بيه نفسك وناسك
وصلى دا الصلاه
والعلم هما حراسك
يشيلوا الكبر من قلبك
ويجعلوك ناسك
خليك على الأيمان
يا ابنى بقلبك ماسك
****
وتمشى لغيطك
على رجولك
وتكحل بالخضرة
جفونك
وتملي بلون
الزهـر عيونك
وتعزف على الناى
شجونك
وتفرح البلابل
لقدومك
وتدعيلك الله
يكون فى عونك
ويحضن الندى
على الخضرة قدمك
وشواشى الدرا
تميل تبوس خدك
وسنابل الأمح
شاهدة على كدك
وأرضك تبتسم لك
والحزام على أدك
وتحلف يمين إن
عرضها من عرضك
ولا فى يوم أبداً
تكون مداس لندك
ولاتغنى مواويلها
ولاتطرب غير ودنك
ولاينام على صدرها
ولا يملا قلبها غير حبك
ولا يحل جدايلها
ولايلمس ضفايرها غير يدك
وتعهدك ما تبوح
بأسرارها لحد من بعدك
****
ولاتفتح دراعتها
ولا تحضن إلا فاسك
ولاتشرب غير ميتك
ولا يرويها غير كاسك
ولا تحنى شعورها
ولاتدهب سنابلها إلا لناسك
****
ودايماً على العهد
حافظة لك
إن فى يوم ما تكون
خاينة لك
وإن بعدت هترجع لها
وراجعة لك
يحميك يا ابنى
مافى يوم ارتحت
وانتظرت يعطيك
عمك ولا خالك
ودايماً تقول لك
يا اسمر اللون
أحب أسمع مواويلك
ولما اكون عطشانة
يروينى عرق جبينك
ربنا يحميك يا ابنى
ويحفظ لنا نيلك
وتجرى ميته السكر
فى شريانى وشرايينك
وأفضل العمر
أغزلك شالك ومنديلك
وإن تاه الطريق منك
أو طال عليك ليلك
أولع صوابعى شمع
وأكون لك قناديلك
وإن داس على فستانى
ندل بصوتى أناديلك
ولو يوم جار عليك
ظالم بروحى أفدى لك
وتنام على صدرى
وتشكى لي وأشكيلك
ده انت أبنى باسمع
همس قلبك وحنينك
ولا فى يوم راح أتصور
غيابك عنى أو رحيلك
بفتح عيونى الصبح
ولرب العرش بدعى لك
يحفظك من كل شر
يا ابنى وينور سبيلك
ويحميك يا مصرى
يا اللى زرع العالم
بذور الحب من بساتينك

لمراسلة المؤلف مباشرة hamed_elatiar @ yahoo.com